كراكيــــــــــب احـــاســــيــــــســـــي

وحشتني الكتابه جدا والبيت ده وحشني قوي مع اني رجعت لقيت فيه حجات متلخبطه كده
والارض عايزه تتمسح وفيه تراب في كل مكان

وناس جاتلي المره الي فاتت ومحدش ضايفهم ولا قام بالواجب معاهم
بس اكيد كنتم عارفين الظروف والحداد الي انا كنت فيه وتالته ثانوي بقي وكده

***************************************

الفتره الي فاتت دي كانت صعبه عليا قوي

والامتحانات الي عدت دي كانت اصعب امتحانات قضيتها في حياتي
كانت بالنسبه ليا حاجه مصيريه حياه او موت
بس الحمد لله عدت ع خير وكله تمام التمام

***************************************

صعب عليا جدا طلاب ثانوي في مصر والي حصلهم
من امتحانات تعجيزيه وتغشيش لطلاب وطلاب تانيه تولع مش مهم
وامتحانات لازم تدفع دم قلبك عشان تنجح فيها
ودرسين في كل ماده طول السنه وبرضو مش نافع ولا بيحوق وساقط ساقط لا محاله
واحنا هنا والحمد لله حصلناكم
والحمد لله الحمد لله كل شويه الحاله بتسوق

والمريض(الي هما احنا) حالته في النازل
انا مش عارفه ايه الغرض من كده
نطلع ناس معقدين وملحوسين ولا ايه
ع راي وزير التعليم دي شهاده ارتضاها المجتمع المصري كله
ماشي انا معاه وارتضاها برضه المجتمع السعودي
بس ارتضيناها بشروط
يعني مش غش في مدارس ومدارس لا زي عندنا
ومش بيع امتحنات في محافظات والمحافظات التانيه نو بربليم مع نافسها بقي
زي مصر
بس يلا بقي دعوا الخلق للخالق

انا مبحبش اتكلم في السياسه

ههههههههههههههه

***********************************

جوايا من ساعة مابدات الاجازه احساس غريب قوي
مش عارفه اذا كنت فرحانه ولا زعلانه ولا مخنوقه
مش عارفه تعبانه ولا لا
محتاجه ارتاح قوي مش عارفه ليه
حاسه جوايا فرحه لا توصف بس جمبيها بالظبط قاعد شبح الفرقه
والسفر والبعد والوحده بينغصوا عليا فرحتي بالنجاح والحياه الجديده
الي الله اعلم هعرف اعيش فيها ولا لا
وهتأقلم مع الناس والجو ولا هقعد في بيتنا كافيه خيري شري وخلاص
ياتري ممكن الناس تتعود ع وجودي ولا هيفضل جواهم احساس اني شهر وماشيه
وبعدين لما يلاقوا الشهر طول يبدا الزهق مني
كل ده في علم الغيب
فربنا يستر

************************************

عندي احساس اني مش عايزه اسافر السنه دي مع ان دي بتبقي امنيه حياتي كل سنه
وفي نفس ذات اللحظه نفسي اروح اسكندريه واقعد ع البحر او جمب بير مسعود

احل المشكله دي ازاي بقي

*************************************

اخر يوم في الامتحانات كنت حاسه اني مش عايزه اروح
شفت كل الايام الحلوه الي عشناها انا وصحابي سوا في المدرسه

دي والايام الوحشه مرينا عليها مرور الكرام
وانا في الباص
سمعت كل اصواتهم واحده واحده ونكاتهم وهزارهم وشفت حركاتهم

فيهم ناس كنت اعرفها كويس قوي واتضايقت اني ضيعت وقتي معاها وهيا متستاهلش

وناس ندمت اني معرفتهاش كويس واتمنيت ارجع الوقت الي انا ضيعته عشانها هي وبس

***********************************

اصحابي الي بره المدرسه هيوحشوني قوي دلوقتي بنشوف بعض كل يوم تقريبا

بس بعد ما نسافر الله اعلم بقي هنشوف بعض تاني ولا لا
يمكن تجمعنا الظروف ونتقابل ع ارض المحروسه

ويمكن تاخدنا دوامه الحياه ويبقي الله يسامحها بقي

**********************************

(ملاحيظي)
دي كانت شويه حجات متكومه في الجهه الخلفيه من المخ فحبيت احطها

وفي شويه حجات تانيه عملتلها ديليت
بس الي مش فاهم حاجه من الي مكتوب او حتي فاهم 90 %

يبقي لازم ياخد درس خصوصي عشان يحصل درجه النجاح
بس وهو جي يجيب معاه سندوشتات جبنه رومي

وبلاش لمشوم اصلو مضر بالصحه وانا مش ناقصه
يلا بقي سلاموووووووز

البقـــــــــــــــــــــــــــاء للـــــــــه

أنا المفروض مكنتش اكتب البوست ده لانه ممكن يزعل اقرب الناس لقلبي

ولكني كتبته لسببين

أولا عشان تدعوا لخاله نونا بالرحمه والمغفره وتقروا لها الفاتحه وتدعوا معايا لاولادها بالصبر ع مصاعب الحياه من بعدها

وثانيا عشان انا عارفه نونا بتحبني وبتحب المدونين قد ايه وانه احنا الي هنقدر نواسيها ونقف جمبها ولو من بعيد لبعيد

مع اني بحمد ربنا اني مش معاها دلوقتي عشان انا مستحملش اشوفها في الحاله الوحشه دي ابدا لاني عارفه قد ايه كانت غاليه عندها وانا بترجاكي انك متزعليش مني ع البوست ده وتحطيه في ميزان حبي ليك وبس

واخيرا البقاء لله في خالتو صفاء

**********

اللهم كن رحيما بكل من احبت

اللهم ارزق اهلها الصبر والسلوان

اللهم انك ارحم علي اولادها من خلقك

فأغنيهم بحلالك عن حرامك

وارزقهم محبتك وطاعتك وقربهم منك ومن من احبك

اللهم اجعل قبرها روضه من رياض الجنه

وافسح لها قبرها مد بصرها وافرشه من فراش الجنه

واملاه رضا ونور وفسحه وسرور

اللهم انس وحدتها وانسها في وحشتها وانس غربتها

يارب ارزقها ثمره صبرها علي مرضها في الدنيا اضعاف مضاعفه

انها صبرت ع البلاء فلم تجزع فأمنحها درجه الصابرين الذين يوفون اجورهم بغير حساب

يارب امنحها شفاعه سيدها وسيدنا محمد صلي الله عليه وسلم

وادخلها الجنه من غير مناقشه حساب ولا سابقه عذاب

يا اللــــــــــــــــــــــــــــــــــه

صـــــــــــــــــــور فن رائــــــــــــــــــــع

دي شويه صور شفتها وعجبتني جدا

ولغايه دلوقتي معرفش ايه السر الي فيها بالظبط

بس هي اكيد تقريبا
طريقه مزج الوان ودقه رسم

بس هي في كل الاحوال اكتر من رائعه

هي عباره عن صور مرسومه ع الارض

وتقريبا هي جوه متحف او مكان مخصوص

ويارب تكونوا مندهشين زي بالظبط

ااااااااااااااه وااااااااااااااااااااو

مستنيه ارائكم فيهم

ها قولو بقا

نــــــــــــــــور

أمـــــــــي ثـــم أمــــــــــــي

أحلي حاجه في 2008

أنها ماشاء الله عليها كل أعيادها ومناسباتها ورا بعض

ابتدأً من عيد الاضحي الي لزق فيه بدايه السنه الهجريه وبدايه السنه الميلاديه

وراح يجري وراهم الاحتفال بكأس الامم الافريقيه الي كان من نصيبنا والحمدلله

وعيد الحب الي مسبلهمش فرصه وقام ماسك في دلهم بسرعه

وأنتهاءً بمولد النبي (صلي الله عليه وسلم) والي بيونسه اليومين دول

عيد الام والاب عشان محدش يزعل بس

وكل ده طبعا في صالحي عشان انا مكنتش اقدر اكتب

في كل مناسبه ع حدى فكده اريحلي

فأنا من موقعي هذا (كرسي مكتب المدونين العرب) أولا أحب أهنيء جميع

الامه الاسلاميه بمولد الحبيب المصطفي سلام الله وبركاته عليه

وأهنيء المصريين خاصه بمراسمه الي منها طبعا حلاوه المولد

ألي انا بذات بكولها بعد المولد ب4 شهور (عقبال مبنزل بقي) هي

صحيح مبتبقاش حلاوه المولد وبتبقي شئ اشبه بالاسمنت المرصع بالفول والحمص

وبيبقي ليها طرق خاصه جدا في الحفظ بس ربنا يخليلنا الي بيحرصوا

كل الحرص علي انهم يجيبوهالنا ويخلونا نشاركهم اقل فرحتهم 0

===

ثانيا بقي كل سنه وكل ام غاليه وزي العسل طيبه

واولهم طبعا امي انا لولو حياتي وعمري

وطبعا بابا برضه عشان انا منغيره ولا اسوى حاجه في الدنيا دي

مهو رجلي وسندي وعزوتي برضه ولا ايه يا شوشو باشا

وفي المرتبه التانيه بقي لازم اقول كل سنه وناناتي طيبين

عشان نانا منيره ونانا نوسي دول الخير والبركه وهما عمود عيلتنا

الي يارب يارب ميحرمنا منهم ابدا

وبما اني ذكرت جداتي الحقيقين فلازم اجيب في سيره جدتي المعنويه

الي هي في المرتبه التانيه مكرر نانا ديدي السكره ودي بقي خلوهالي ع جمب

عشان دي حاله خاصه لوحدهاكده عندي

وبما ان ده عيد الام فلازم اقول كل سنه وكل ماما طيبه

وكمان هقول لاخواتي الكبار(خلو بالكم من الكبار دي)الي هما بقو مهمهات بدري قوي

فكل سنه ومرات خالي دودو ومرات عمي نونا ومرات خالي فؤش طيبين

وفي واحده بقي استحاله ابدا انساها عشان هي غلبانه قوي السنه دي

وكان كل سنه4بيقوللها كل سنه وانتي طيبه وجها لوجه بس السنه دي بقو 3 فانا بقولها بالنيابه

عن البشموهندس ابنها كل سنه وانتي احلي ماما يا عمتو

وبعد مرسمتلكوا شجره العيله أحب اهني كل مامه لكل صاحب كومنت عندي

او حتي قرأ كلامي ده منغير ميقول رأيه

والكلام ده لكل ام عملت كل مافي ايديها لتسعد اولادها

او حتي تحميهم بمساعده بابا اولا طبعا

====

ملاحظه مهمه

مش عايزه حد يكتبلي في الكومنت جبتي لمامتك ايه هديه؟؟؟

عشان الاحراج والنبي

اوحش حاجه في عيد الام انه بيجي اخر الشهر

يعني الي خلاه21\3 معرفش يخليه2\3 ولا حتي اول 4الله يسامحه بقي

جيبنا لورا وجبلنا الكلام

مع تحياتي

نـــــــــــــــــــــــــــــور

مـــــــــــجنونة في زمن مــــــجنون

دخلت أقرأ في السرير

وأبحث في مخيلتي عن

كلــــــــمة حـــــــب

بين كلماتي الصماء

كلمه لم يكتبها قلم

كلمه بيضاء نقيه

كلمة لها طابعها الخاص

وتأثيرها الفريد

كلمه تصبح رمزا

تصبح لغزا

وسوف تكون سرا

كنت ابحث عن معني

لم يرَ احدا

ولم يره احد

ليصبح سر مكنون

والليل حولي سكون

وأنا مازلت غارقه

في الصمت المجنون

فمن رأوني في تلك الليله

هم من همسوا بتلك الكلمه

هم من قالوا اني مجنونه

لاني ابحث عن شئ

لم يوجد

ولن يوجد

فانا اصبحت مجنونه

في زمن مجنون

وما اجمل حركات تلك الجنون في عيني

بـــحـــر الـــبـــشـــر

وقـــفــت عــــنـــد الـــشـــاطـــئ

تــــداعــــب نــــظـــراتـــهــــا بــرؤيـــة الـــبـــحـــر

فــيـهـدي لـهــا نـسـيـمـه لــيــحرر خــصــلات شعرها الكـحـيـلـه الـشـرقـيـه

ثـم يـرسـل امـواجــه لـتـلامـس قـدمـهــا

فـتـذوبـهـا فـي رمـالـه وتـنـغـرس بـهـا

فـتـخـرج شـحـنـات غـضـبـهـا وأحـزانـهـا وألامـهـا

الـتـي جـنـتـهـا طـوال عـامـهـا الـسابـق

مـتسـربـه بـســرعــه في الـرمـال

فتأتي موجه اخري لتحمل هذه الشحنات

وتنثرها لتضيع داخل احشاء البحر

وتـعـود هـي صـافـيــه الـذهـن

بـيـضـاء نـقـيـه حـامـلـه لـصـفـات الـبـحـر

فـهـي تـداعـب الـصغـار بـنـظـراتـهـا

وتـذوب الـناس فـيـهـا عـشـقـا

وتـحـرر الـنـسـاء مـن قـيـودهـن

وتـمـتـص غـضـب الـرجـال

وتـنـتـشـل الــنـاس مـن احـزانـهـم

ولا تـتـأثـر هـي بـشـئ

فـهـي عـالـم مـفـتـوح لـكـل الـبـشـر

فـهـي بـحـر اسـرار الـبـشـر

كل سنه واحنا كويسين

أكــتــب عــامـــك الــجــديـــد

عــلــي ورق أبــيــض

لــيــــس عـــلــــي ورق الاســـتـــســـلام

ولـــكـــن عـــلـــي ورق حـــب مــبـــلل

أكـــتـــب عــامــك الــجـــديـــد بـــمــاء صـــافـــي

فـــــبالله عـــلــيـــك مــاذا اصـــطـــدنـــا مــن الــمــاء الــعــكــر؟؟

مـــــــــــاذا بــــــــــــــــك؟؟؟

أهـــذا هـــو عـــشـــاء الـــعـــام الـــجـــديــــد؟؟؟

فـــالـــمـــدعــــون كـــثـــــر

ولا يــــوجـــد لــلـــولـــيـــمـــة غـــيـــر خـــبــــز يــــابــــس

ولـــــــــكــــــــــن0000

ومـــع كــل هــــذا مـــابــيــدي غـــيـــر ان اعـــفـــو عـــنـــك

وأقـــــول كــــل عــــام وأنــــــت الـــــخــــيــــر

يــــــــــــا وطـــــــــــــــنـــــــــــــــــــي

*****

كل سنه والكل طيب وبخير

انا عارفه اني اتأخرت يومين بس معلش بقي اعذروني

ولعلمكو كمان انا هجمع مناسبات كتير قوي في البوست ده

يعني كل سنه وانتو طيبين عشان العيد والخروف وكده

وكل سنه وانتو طيبين عشان السنه الهجريه الجديده

و

Happy New Year 4 Every 1

وصدقوني لو كنت اقدر اهنيكو ع عيد العمال و6 اكتوبر و23يوليو

كنت عملتها من دلوقتي

عشان اكيد انتو عارفين الي عندي

معدا بقي عيد الحب عشان ده ليه عندي معزه خاصه

فلازم ساعتها يبقي ليه تهنئه أسبشيل

المهم

كل 2008وانتو احسن

وانا كمان احسن

عشان 2007 دي كانت سنه ربنا مايعودها ابدا

قولو امين

ويارب تكون سنه جميله ع كل الوطن العربي

وع مصر بالذات

وعلي اهلها وشعبها الطيب

ويارب تعلا وتعلا وتعلا

منغير منطاطي و نطاطي و نطاطي

وكل سنه وبابايا ومامتي كويسين

وكل سنه واخواتي ناجحين

وكل سنه واصحابي الي سبتهم في 2007 والي عرفتهم طيبين

وكل سنه والي حبوني وحبيتهم أجدع ناس

وكل سنه وامالنا تتحقق

وكل سنه وافكارنا تتحرر

وكل سنه وجيوشنا تكبر

وكل سنه وقوتنا تزيد

وكلمتنا انشاء الله تتوحد

وكل سنه ويخلينا لبعض

وكل سنه ولا يحرمنا من الي حبونا وحبناهم

وكل سنه وكل البلوجريه طيبين

*****

انا بقي هعتذر منكم

وهستأذنكم اغوصلي قد شهر ونص كده

عقبال ماخلص امتحنات

وياريت تدعولي كتير قوي

وتقولوا يارب يانور يابنت ام نور تحققي كل الي في نفسك

لا علو صوتكم شويا وارفعو اديكم لفوق

بذمه يعني

وع الله ارجع القيكم ناسيني وناسين البلوج ده

ع الله مش هيحصل طيب ساعتها

ويلا بقي نتقابل ع خير

في موعدنا يوم 8/2/2008

واستنوني فيه انشاء الله حاجات حلوه وصواريخ وبمب وبلونات وحجات كده

ارجعلكم ع خير بقي

إلــــي عـــنـــدنــــا عـــــنـــــدهـــــم

سبحانك ياربي فعلا صدق الي قال

الحب ملوش كبير ولاسن ولا وقت

أنا مش عارفه أيه الي فكرني بالقصه دي دلوقتي بالذات

ولا حتي جت ع بالي ليه

مع انها خلصت من زمان قوي

بس انا حبيت أكتبها هنا عشان تبقي ذكري لاحلي بنوته في حياتي

لما تكبر كده أجيب أولادها وأقولهم شوفو القصه دي عن مامي

أقروها بقي بصوت عالي وسمعوها عشان تفتكر الذي مضي

القصه دي بقي عن اختي دودي الي طبعا كلكم عارفينها

وسبق ذكرها في بوست قبل كده

وإلي ميعرفهاش يرجع للمراجع والكتب الخارجيه أصلها دخلت التاريخ

المهم دودي كانت في كي جي(1) يعني

كان عندها 4 سنين(أصلها دلوقتي كبرت ماشاء الله عليها وبقي عندها 5 في عين الي مايصلي ع النبي)0

المهم وتقريبا كده من أول شهر ليها في المدرسه عرفت ولد أو بمعني اخر حبت ولد اسمه اياد

وتقريبا كده كانت 24 ساعه بتتكلم عنه وهي نايمه كمان كانت بتحلم بيه

وجــنــنــتــنــا بيه

وبما اني اختها الكبيره فكانت متلاقيش حد تكلمه عن الاستاذ إياد غيري

مع ان بابا كان عارف وماما وتقريبا كل الي كنا نعرفهم كانو عارفين

ولدرجه اني كنت بنام اقول اياد اللافي اياد اللافي واقوم اصوت

المهم بقي ان الانسه دودي مكنتش بتلعب مع بنات خالص لانها كانت دايما بتقعد معاه هو واصحابه

الموقف الحلو بقي انه مره ماما راحت لها المدرسه فلقت ولد بيشاور عليها من بعيد

وإذ فجأةً لقت مامته جايه ناحيتها وطبعا ماما خدت ساتر

فقربت منها وقالت لها

-أنتي مامه نادين؟؟

-أيوه انا مامتها ليه في حاجه؟؟

- لا مفيش اصل مصطفي ابني كل يوم يرجع من المدرسه معيط بسببها

- ليه كده بس بتعمله ايه

- لا ابدا بيرجع يقولي ماما انا بحب نادين وهي مش بتحبني وبتحب اياد وانا بقيت اكره اياد

وطبعا ماما مكنش في ايديها حاجه غير انها تضحك وخلاص

بس الموقف بقي الي هو مقصود في البوست ده هو

انه في مره إياد ده اعلن التمرد ع نادين وبدأ وصلات الغلاسه والرخامه والغتاته

فكانت ترجع معيطه وتحكي لباباوماما وتيجي تقولي إياد عملي كذا وكذا

بس انا بحبه وهو والله بيحبني

وأنا اقول جوه نفسي معلش يابنتي اصبري مفيش حاجه بتيجي بالساهل

فالمهم بابا قرر يحط فاصل للموضوع ده

راح جاب حلويات وحجات من دي

وراح للانسه فاتن حمامه اختي المدرسه

وشاف اياد وأداله الحلويات دي وقاله

يريت متزعلش نادين تاني ودافع عنها عشان هي بتحبك قوي

المهم بقي ان اياد كان مبسوط قوي بالحجات دي

وراح بابا قال للانسه فاتن حمامه لو زعلك تاني تعالي قوليلي

وبقت كل يوم ترجع لنا بقصه جديده مع الاستاذ اياد

ودموع بقي وحجات كده

فبابا بدأ يطقس ويشكي للمدرسه عنه وعن الي بيعمله في نادين

بس الصدمه بقي انه

اتضح بعد كده ان هو مش بيعمل لها حاجه من ساعه الكيس اياه وانه بقي معاها زي الملاك

وان الانسه مديحه يسري اختي بتقول كده بس عشان أياد كان فرحان بالحلويات

فضحت بنفسها وبدموعها أعتقادا منها أن كل ما بابا يفتكر انه بيدايقها يقوم يجيبله حلويات اكتر

وبكده تكون اسعدته طول حياته

شفتوا بقي إلي عندنا عندهم إزاي

بس علي مراحل تفكير مختلفه

فعلا سبحانك يارب

القلب قلب ولو قد ايه كان حجمه

سبحانك يارب

وبكده اكون الحمد لله اتميت وصله الفضايح ع الفضئيات

وشكرا

هــــل مــــن جــــديــــد ؟ ؟

قــــالَ لــــي:

لا تــســألــيــنـي مــا الـجــديـــد ؟

فـهـل فـي غـيـابـكِ مــن جـــديـــد ؟ ؟

تـتـشـابـهُ الـسـاعـاتُ والايــام

والــصــدأ الـمـلـبـدُ بـالـجــلـيـد

لا حـزن يـشـجـيـنـي

ولا فـرح يـذيـب رواســب

الــمــلــل الــبــلــيــد

حـتـي أراكِ عـلـي الـمـدى

فـي بـسـمـةِ الافـــق الـبـعـيـد

فــتــزفــُنــي الافــراح مــولــوداً

يــهــلــل للــوجــود

إنــي أراكِ حــبــيــبــتــي

فــتــذيــب بــســمــتــكِ الــركــود

وأعــود فــي حــضــن الــحــيــاه

وقــد يــئــســتُ بــأنــنــي

يــومــاً أعـــــــود

كـــل ســنــه وانــــت طـــيـــــب

كل سنه وانت طيب

ومن قلبي قريب

والسنه دي معايا

وإلي جاي ويايا

يا أغلي الحبايب

ياسكر ودايب

يا كل الحبايب حبايب

كلك خير وطيب

وعمري الي جاي هشيلك بين عيوني شيل

ولو هقدر ياروحي هجبلك نجوم الليل

حبيبي معاك الحب طعمه جميل

وعمري الي جاي هشيلك بين عيوني شيل

ولو هقدر ياروحي هجبلك نجوم الليل

حبيبي معاك الحب طعمه جميل

وكل سنه وانت طيب

--------

عيونك حبيبي

رموشك ياعيني

خدودك ياسيدي

ياسيدي الله عليك

وعيدك ده عيدي

وحبك نصيبي

وقلبك حبيبي حبيبي

انا عمري ليه

وعمري الي جاي هشيلك بين عيوني شيل

ولو هقدر ياروحي هجبلك نجوم الليل

حبيبي معاك الحب طعمه جميل

وكل سنه وانت طيب

----------------

وكل سنه وانت طيب

إلي اغلي مافي حياتي

إلي احلي صديقاتي

إلي من لا اطيق العيش بدونها

إلي عمري وكل حياتي

كل سنه وانتي بخير وسعاده

ياأجمل أم في الدنيا

يا احن حضن في العالم

يابئر اسرار عميق

كل سنه وانتي احلي واجمل

ام واخت وصديقه وحبيبه

كل سنه وانت طيبه

*********

حــــروف فـــــي الصــــداقــــة

الصــــــــــداقـــــــــة

كصحه الانسان لاتشعر بقيمتها النادره الا عند فقدانها

الصــــداقــــة

هي عقل واحد في جسدين

الصــــداقــــة

هي ان يكون لكل منا طريق ولكن اينما ذهبنا

فكل منا يحمل جزء من الاخر

الصــــداقــــة

هي نعمه من الله وعنايه منه بنا

الصــــداقــــة

هي ملح الحياه

وسكره اذا ملحها زاد

******

يــا صــــديقــــي

إذا كنت ستعيش مئه عام

فأنا اتمني ان أعيش مئه عام تنقص يوما

كي لا اضطر للعيش بدونك يوم كامل

يـــا صديقـــي

اذا كان لابد لنا ان نموت

فأرجوك ان تسأل إذا كان بالامكان

أن تأخذني معك أينما تذهب

يا أصــدقائـــي

لو قررتم القفز من فوق جسر

فأنا لن أقفز معكم ولكن

سوف انتظركم تحت الجسر لأتلقاكم

يــا صـــديقـــي

أتعلم منك وتتعلم مني ولن نختلف

يــا صــديقــي

لاتمشي أمامي فربما لا أستطيع اللحاق بك

ولاتمشي خلفي ربما لاأستطيع القياده

ولكن أمشي بجانبي وكن صديقا عونا لي

******

مـــن هـــو الصـــديـــق؟0

الصــــديـــق الحــقــيــقــي

هو الذي يمشي نحوي

عندما يبتعد كل العالم عني

**

الصـــديـــق هو الشخص الذي يعرف أغنيه قلبي

ويستطيع أن يغنيها لي عندما أُضيع كلماتها

**

يقول لي ابي دائما

عندما تموت ولديك (5)أصدقاء

فتأكد أنك عشت حياه عظيمه

**

الجميع يسمع ما أقول

والاصدقاء يسمعون ماتقوله عيني

ولكن افضل أصدقائي الذي يسمع مالا أستطيع قوله

**

أقول لنفسي دائما

أن تتمسك بالصديق الحقيقي بكل ماتملك من قوه

*****

أهدي إخلاصي الي كل أصدقائي

أولهم ريهام ، رضوي ، سمر

علا ، ندي ، ناشا ،يارا

وأهــــــــــداء خــــــــــــاااااص جـــدااا

لنور

عشان هي الي كانت بعتالي الاميل ده

وأنا هنا بهديهولها امام العالم كله من كل قلبي

وبهديه برضه لكل اصحابي البلوجريه

ولكل من صادقت من الناس ولو ليوم واحد

عدنا

بعد إتخاذي لقرار مفاجئ وبدون اي مقدمات مسبقه

وقرار أقرب مايكون للصعب عليَ

بأن أتوقف عن التدوين

وأن أكتفي بالتعليق عند أجمل أصدقاء

عرفتهم وعرفوني وكانو يقتطعون جزءاً من وقتهم

لزيارتي ومتابعتي وترك اجمل بصمات في صفحه التعليق

والذين مازالو الي وقت قريب جدا

وبعد توقف المدونه لمده 7 أشهر متتاليه

علي التعليق عندي وايضا ترك اجمل بصمات خفيه

وإرسال الإيميلات الجميله

أحسست من خلال ذلك كله أني قد فقدت

أصدقاء أحبوني لشخصيتي وليس لشخصي

وأنني بإغلاق المدونه قطعت الصله بيني وبينهم

فقررت قرار اخر وكان اسهل علي من القرار الاول بكثير

وهو العوده من جديد للتدوين

ولكن كلما تسمح الظروف بذلك

وبذلك أكون قد عدت لعالمي

الذي صنعته بنفسي

لأضع فيه نفسي

معبره فيه عن نفسي

وفعلا قد كانت فرحتي بهذا القرار

أكبر بمراحل كثيره من إختياري لإنشاء المدونه من الاول

لإحساسي بالقرب من الهاويه والانفجار

ومن ثم العوده الي الحياه

فشكرا لكل من عاونني لإتخاذ هذا الاجراء

وأقناعي به

عودا حميدا

والحمد لله

وصلنا لبيتنا سالمين

سؤال

يااااااه

يوم وقفت بي حزيناً

مطأطئ الرأسَ

تنزفً احلامكَ بصمت

ولا يلاحظ المارة حتي أنينك

***

ماءُك الكثيفُ أرضاً

وأيامُك الجميلة مسجونة

في كتاب للذكريات

***

لم اعرفك والغبار يغطي يديكَ

كأنكَ الغريب لايسامحنا

ولاترد علينا فنرتاح من أصواتنا الداخلية

***

تتركنا نمرح في شوارعُك

بربطات عنق انيقة

وأحذية سهرات لافتة

في سيارات سوداء فاخرة

وانتَ 0000 تنزف

***

وكم قالوا انكَ القاسي

وما قسوت

وأنكَ متنكر

و والله ما تنكرت

***

وقد حملوك إزر معاصيهم

وصلبوك أكثر من مرة

ومرت سنون والقبر مظلمٌ مظلم

فمتي القيامه يا0000

وطني؟؟؟؟

اجازه عارضة

بصراحه السنه دي اجتماع القمه العربيه ليه عليا افضال كتيره

احسن تلاته فيهم

ان احنا اخدنا اجازه من المدارس فتره الاجتماع كله والقطاع الحكومي كمان

وتاني حاجه ان بابا فرحان جدا بالاجازه وده من النادر

لان بابا بيحب شغله جدا

وتالت حاجه وده الاهم :الي حاصل في شوارع الرياض

مش عارفه اقوللكم ايه عنها

لان مدرستي جنب الماريوت ع طووول

فطريق مدرستي كله مليان اعلام

من اوله الي اخره + الورد+ العبارات الي كتبوها

زي مثلا : الاتحاد في الحق قوه

اهلا وسهلا بكم في بلاد السلام

وغير كده كتييييير

مع اني اصلا بحب تصاميم وطرق الرياض بس النيولوك ده حلو جدا

وبعيد عن كل ده حلو انه يبقي فيه يوم يتفق عليه العرب عشان يجتمعو

لاني بصراحه(بعيد عن المؤتمروما فيه)من انصار مقوله

اتفق العرب علي الا يتفقوا

يعني حتي عندي في المدرسه تلاقي الكل يقولو ايوه

وفي نفس ذات الوقت لازم تلاقي واحده بتقول لا كده وخلاص

من غير اي مبررات او مبررات هابله ملهاش لزمه

بس انا مالي دع الخلق للخالق

ويارب يكون اجتماع قمه عربيه مثمر ومش زي بتاع

فلم شورت وفنله وكاب

ومره اخيره: اهلا وسهلا بكم في بلد السلام

اعرف حدودك وبعدين اتكلم

بصوا بقي انا بعد ما قفلت النت وقلت اقوم أقرا حاجه ماهي برضه الارايه بتنور العقل وبتوعي الدماغ وبتخلينا نكتشف حاجات مكناش عرفنها وده فعلا الي حصل معايا لما فتحت مجله الشباب وقرات تحقيق كتباه وحده زي العسل اسمها بسمه عامر بعنوان اعرف حدودك الاول وبعدين اتكلم لقيت اني مكنتش عارفه إن بلدي فيها ناس في قمه التفاهه و بالشكل ده ، وابسط حاجه عنك يا مصر اولادك مش عرفنها، بصوا أنا لو كتبت اكتر من كده ممكن احرق الموضوع وانا مش عايزه كده انا عيزاكم تقراوه بنفسكم عشان تتضحكوا من قلوبكم، انا قررت اكتب لكم البهاريز بتاعت التحقيق والي عايز يقراه كامل هيلاقيه في مجله الشباب في عدد فبراير2007 ص51 بس ع العموم انا تقريبا كاتبه معظمه .نبدأ بسم الله بالسوأل الي إطرح ع مجموعه من شعبك يا ام الدنيا وهو

ماهي حدود مصر الجغرافيه ؟؟

اسمعوا وعو للإجابات واستعدوا للتعليق

اولهم:واحد عمره 31س ومعاه ليسانس اداب تاجر وبيقول: يحد مصر من الشرق شبه جزيره سيناء ومن الغرب الصحراء الغربيه وحاجه تانيه كده يعني مش فاكرها

تانيهم:واحد عنده 25س ومعاه دبلوم فني صنايع وقال: تقع ليبيا شمال مصر وفلسطين في الجنوب والسودان في الشرق

ولا اعرف ما يحدها من الغرب

تالتهم:راجل عنده29س بائع فاكهه قال لاأعرف الشرق من الغرب وكل ماأعرفه أن جرانا هم الاردن وفلسطين وليبيا

رابعهم:واحد عنده20س صاحب كشك قال:ظروف الشغل مبتخلنيش أهتم بحاجه غيره لانه اكل عيش لكن حدود مصر دي هتأكلني عيش وجهه نظر برضه

خامسهم:عنده35س نجار قال: السودان في شمال مصر وفي جنوبها اسوان ومن الغرب معرفش

سادسهم:ده بقي فيلسوف عصره كان عنده30س ومهندس وقال تقع الاردن عند حدود مصر الشرقيه وكفايه ع كده

سابعهم:اما بقي المصيبه التقيله كان عنده21س ومتخرج من سياحه وفنادق يعني حافظ الخريطه صم شوفوا قال ايه:يحد مصر من الشمال السودان ومن الجنوب ليبيا ومن الشرق البحر الاحمر ومن الغرب البحر المتوسط

اما اخيرا فنختم بتامنهم وهي من النص الحلو يعني بنت وكان عمرها 27س وكوافيره وتكرمت وقالت:من الشمال البحر المتوسط ومن الجنوب افريقيا ومن الشرق السعوديه ومن الغرب البحر الاحمر

وانا بقي بعيد عن السامعين قفلت المجله وانا ناسيه حدود مصر ايه فإلي فاكر يقوللي عشان منضعش ع الخريطه

ياأولاد ال........ده اصغر واحد فيكوا عاش 20في بلد مش عارف حدودها . ده والله اختي الي عندها 4س عارفه ان مصر اسمها ايزبت وانها في افليكا(اصلها تعليم اجنبي عقبال املتكم)علي قد سنها يعني وانتو عايشين من زمن ولسه معرفتوش ده والله انا حسيت انهم بيقولو حدود بلاد سيكولالاميمي مش بلدهم مصر

ادى مصر ياعبله ...لا والله عمااااار يامصر

صدق من قال ورانا ايه ورانا ايه....وبلدكم ايه

يريت كل من يقرا البوست يقولي تعليقه عشان محسش اني انا الي لوحدي فاهمه غلط . اوكيه

ملاحظه

الي مكتوب بالازرق منقول من المجله نصاً