أنــــــــــــس .. مـأ تـــــرد يــــا واد

جبتلك اللي انت كاتبهولي

و فانلة و شورت جٌــداد

جبتلك الكوتشي .. على المكتب

خليك جاهز .. و على استعداد

جبتلك الشنطة اللي عايزها

ما ترُد يا واد

..

ما ترُد بلاش توجع قلبي

بكدب على أمك و مخبّي

و بقولها لسّه ف الديربي

جوّا الاستاد

طب أقولها إيه

طب مات كدا ليه

و ف أنهي بلاد

طب مين حيجرّيني وراه

طب مين حيضحّكني معاه

طب أقولّها .. تاه

ما ترُد يا واد

طب رٌد و والله لأسامحك

و حخلّي أخوك ييجي يصالحك

دا أنا حلم حياتي أحضر فرحك

محضرش الدفنة ب سَنّاد

اللــــــــه يرحمك يا أنــــــــس ويبرد نار قلب اهلـك .. مكنش ليك ذنب في الي حصل .. كان كل همك تفرح في اجازتك وتشوف ناس بتحبها وهي بتلعب .. صغرتني قوي قدام نفسي .. وحلفت لأدعيلك في صلاتي .. وخصوصا لما عرفت وصيتك .. حد يقول ان طفل بالبرائه دي يكتب وصيه .. انت كتبت وصيه بأهداء قرنيتك لمصابي الثوره .. وواحد كان طول عمره وصيته يمسك ابنه الكرسي .. انت مت وهو عاش .. حسبي الله ونعم الوكيل .. فعلا صدق من قال (( مات من لا يستحق الموت .. وعاش من لا يستحق الحياه )) حقك عليا انت وكل الي ماتوا بدون ذنب زيك .. يأجمل ضحكه برائه شفتها ...

دايما جدتي كانت تدعي وتقول يارب نزلني تربتي بارده .. ولا تحرق قلبي علي حد .. ولا تحرق قلب حد عليا .. انا حاليا استوعبت معني الدعوه دي .. وبقولها .. (( يارب أنزل تربتي بارده .. ولا تحرق قلبي علي حد .. ولا تحرق قلب حد عليا ))
محدش عارف قدره ايه ولا ازاي ولا فين وشكله بيقرب قوي دلوقتي وبيجي في ابعد مكان ممكن تتخيله .. بتروح وانت متأكد انك في امان وبترجع متشال في اكفان .. يارب ارحم شهدائنا وارحمنا ..
ولو حصل .. يــــــارب أحتسبني شــــــهيدة ...

إنــــــــــــا للــــــــه وإنــــــــا إليــــــــه لراجعــــــــــــون ...